Աշխարհահռչակ գեղասահորդ Իլյա Մալինինը հանդես է եկել սենսացիոն հայտարարությամբ. մարզիկը որոշել է ժամանակավորապես դադարեցնել իր մարզական կարիերան։ Ի՞նչն է դրդել «քառակի թռիչքների արքային» նման կտրուկ քայլի դիմել հենց փառքի գագաթնակետին։
«Ուզում եմ հանգստանալ». Մալինինի խոստովանությունը
21-ամյա ամերիկացի գեղասահորդը, ով հանդիսանում է աշխարհի եռակի չեմպիոն և թիմային պայքարում օլիմպիական չեմպիոն, նշել է, որ իրեն դադար է անհրաժեշտ 2026/27 մրցաշրջանի համար։
«Ցանկանում եմ մի փոքր հանգստանալ սահելուց։ Օլիմպիական խաղերից առաջ վերջին չորս տարիները չափազանց ծանր էին։ Այդ պատճառով ուզում եմ դադար վերցնել՝ լինի դա կես մրցաշրջան, թե ավելին», — անկեղծացել է մարզիկը։
Օլիմպիական ձախողումն ու հոգեբանական ճնշումը
Չնայած Մալինինը Միլանի 2026թ. Օլիմպիական խաղերում ԱՄՆ հավաքականի կազմում նվաճեց ոսկե մեդալ, անհատական ելույթը նրա համար իսկական տրագեդիա դարձավ։ Լինելով գլխավոր ֆավորիտը՝ նա երկու անգամ անկում կատարեց և զբաղեցրեց ընդամենը 8-րդ հորիզոնականը։
Մարզիկի խոսքով՝ ձախողման հիմնական պատճառներից մեկը ֆեդերացիայի և լրատվամիջոցների կողմից գործադրվող հսկայական ճնշումն էր․ «Ես անընդհատ մտածում էի՝ ի՞նչ կարող էի այլ կերպ անել։ Բայց պետք չէ կենտրոնանալ անցյալի վրա, պետք է դասեր քաղել և առաջ շարժվել»։
Ի՞նչ է սպասվում հետո
Իլյա Մալինինը շեշտել է, որ սա կարիերայի ավարտ չէ, այլ միայն «վերալիցքավորման» շրջան։ Նա դեռ վերջնական չի որոշել՝ կբացակայի՞ ամբողջ տարին, թե՞ ավելի շուտ կվերադառնա։ Այս ընթացքում նա նախատեսում է հանդես գալ սառցային շոուներում, որպեսզի հասկանա իր ներքին վիճակը։
Մարզիկի հեռահար նպատակները մնում են անփոփոխ. նա մտադիր է փայլել 2030 թվականի Ֆրանսիայի Օլիմպիական խաղերում և 2034-ին Սոլթ Լեյք Սիթիում։
Իլյա Մալինինը հայտնի գեղասահորդներ Ռոման Սկորնյակովի և Տատյանա Մալինինայի որդին է։ Նա արդեն իսկ մտել է պատմության մեջ որպես բացառիկ մարզիկ, ով սահմանել է համաշխարհային ռեկորդ կամավոր ծրագրում և դարձել աշխարհի եռակի չեմպիոն (2024, 2025, 2026)։
նյութի աղբյուր՝