Facebook- ը ներկայացրել է խելացի ակնոցների նոր շարքը, որը մշակվել է EssilorLuxottica-ի և Ray-Ban-ի հետ համատեղ: Այս մասին ասվում է ընկերության կայքում տեղադրված մամուլի հաղորդագրության մեջ:
«Մենք ոգեշնչված ենք ներկայացնել Ray-Ban Stories-ը, խելացի ակնոցներ, որոնք թույլ կտան լուսանկարել և տեսանյութեր նկարել, կիսվել տպավորություններով, լսել երաժշտություն և զանգահարել նոր եղանակով»,- ասվում է հայտարարության մեջ:
Սարքի գինը սկսվում է 299 դոլարից (մոտ 144 հազար դրամ): Ապրանքը հասանելի կլինի 20 տարբեր դիզայնով և կարելի է ձեռք բերել առցանց և խանութներում՝ ԱՄՆ-ում, Ավստրալիայում, Կանադայում, Իռլանդիայում, Իտալիայում և Մեծ Բրիտանիայում:
Ակնոցները ներկառուցված են երկու տեսախցիկներով՝ հինգ մեգապիքսել թույլատրելիությամբ, ինչը թույլ է տալիս լուսանկարել և տեսանյութեր ձայնագրել մինչև 30 վայրկյան երկարությամբ՝ օգտագործելով կոճակը կամ ձայնային օգնականը՝ Facebook Assistant-ը: Դրանք հագեցած են նաև երեք խոսափողով և բարձրախոսով: Լուսային ինդիկատորը ազդանշան է տալիս մյուսներին, որ նկարահանումներն ընթացքի մեջ են:
Բացի այդ, Facebook View հատուկ նոր հավելվածի հետ համաժամացումը թույլ կտա սարքերի սեփականատերերին կադրեր ուղարկել անմիջապես տարբեր սոցիալական ցանցեր և մեսենջերներ, ինչպես նաև դրանք պահել հեռախոսում՝ հետագայում խմբագրելու համար:
