Գոլանի բարձունքներում բնակվող իսրայելցիների ընտանիքի 3-ամյա տղան ապշեցրել է բժիշկներին՝ անգլերեն խոսելու իր ունակությամբ:
Ինչպես գրում է Oddity Central-ը, Օ’Նիլ Մահմուդ անունով փոքրիկ տղան, որը երբեք անգլերեն խոսք չի լսել, խոսում է բրիտանական շեշտադրությամբ: Ծնողների խոսքով՝ լեգենդար բասկետբոլիստ Շաքիլ Օ’Նիլի պատվին անվանակոչված տղան չէր խոսում մինչև 2 տարեկանը: Այնուհետև սկսել է անհասկանալի բառեր արտասանել, որին հետևել է սահուն անգլերենը:
Նա սկսել է օգտագործել անգլերեն բառեր, որոնք երբևէ չեն էլ արտասանվել իրենց տանը: Տարօրինակն այն է նաև, որ փոքրիկ Օ’Նիլը չգիտի արաբերեն համարժեքներն այն բառերի, որոնք ասում է անգլերեն:
Փոքրիկի պապիկը նշել է, որ ինքն էլ հաճախ չի հասկանում, թե թոռնիկն ինչ է ասում և պատասխանում է. «Այո, լավ»: Երեխայի ծնողները նույնպես անգլերեն չեն խոսում:
Երեխան մանկապարտեզ է հաճախում, սակայն նրա արաբերենի իմացությունը շատ ավելի թույլ է, ինչի պատճառով նա դժվարությամբ է հաղորդակցվում ծնողների և մյուս երեխաների հետ:
Փորձագետների խոսքով՝ դա կարող է քսենոգլոսիի դեպք լինել, երբ մարդ խոսում է մի լեզվով, որը չէր կարող յուրացրած լինել բնական ճանապարհով։
