Մայիսի 6-ին Երեւան քաղաքի քննչական վարչությունում ՀՀ քրեական օրենսգրքի 258-րդ հոդվածի հատկանիշներով հարուցվել է քրեական գործ՝ «Ֆեյսբուք» սոցիալական ցանցում ուղիղ եթերով օգտատիրոջ կողմից բռնություն գործադրելու սպառնալիքներ տալով, բացառիկ ցինիզմով զուգորդված խուլիգանություն կատարելու դեպքի առթիվ։
Ոստիկանությունից հայտնում են, որ մայիսի 7-ին Քրեական ոստիկանության գլխավոր վարչության եւ Երեւան քաղաքի քննչական վարչության աշխատակիցների օպերատիվ-հետախուզական եւ քննչական գործողությունների շնորհիվ տղամարդը հայտնաբերվեց եւ կասկածանքով բերման ենթարկվեց եւ ձերբակալվեց։ Նրան մեղադրանք է առաջադրվել։
Նախաքննությունը շարունակվում է։
Նշենք, որ խոսքը Նարեկ Սարգսյանի մասին է, որը հանրությանը հայտնի է նրանով, որ 2019-ի նոյեմբերի սկզբին Հանրապետության հրապարակի մետրոյի մոտ «ՀուԶանք ու Զանգ» ներկայացման մասնակիցների վրա զելյոնկա էր ուզում լցնել: Իսկ վերջերս մի տեսանյութ էր տարածվել, որտեղ Նարեկ Սարգսյանը ներկայանում էր որպես տաքսու վարորդ եւ վիճաբանության մեջ էր մտնել ոստիկանների հետ, որոնք նրանից պահանջում էին ցույց տալ տեղաշարժի թերթիկը:
