ՀՀ վարչապետի պաշտոնակատար Նիկոլ Փաշինյանը ՀՀ սպորտի եւ երիտասարդության հարցերի նախարարության աշխատակազմին ներկայացրեց նախարարի պաշտոնակատար Գաբրիել Ղազարյանին:
Փաշինյանն իր խոսքում նշեց. «Ես կարծում եմ, որ մենք պետք է մտածենք ոչ միայն մարզական նվաճումների մասին, այլեւ արձանագրենք, որ մարզական նվաճումներն առավել հավանական են դառնում այն ժամանակ, երբ որքան հնարավոր է մեծ թվով մարդիկ են զբաղվում սպորտով եւ ֆիզկուլտուրայով: Այնպես որ սա իսկապես ռազմավարական ուղղություն է: Մենք գիտենք, որ հնարավորությունների սահմանափակում ունենք, սակայն ընթացիկ ժամանակաշրջանի առանցքային քաղաքական իմաստն այն է, որ մենք ընդլայնենք մեր երկրի, ժողովրդի համար սահմանները»:
Նա հաջողություն մաղթեց Գաբրիել Ղազարյանին այդ քաղաքական ծրագրի իրագործման ճանապարհին. «Սա չափազանց կարեւոր է եւ հույս ունեմ, որ մեր կառավարութան գործունեությունը կնպաստի ՀՀ-ում առողջ ապրելակերպի խթանմանը, ֆիզկուլտուրայի եւ սպորտի տարածմանը, երիտասարդության ակտիվ մասնակցությանը քաղաքական, հանրային, մշակութային, մարզական կյանքին: Երիտասարդությունը մեր ազգային պոտենցիալի ամենակարեւոր կրողն է եւ մենք պետք է ամեն ինչ անենք, որ այդ պոտենցիալն իրացվի»,- ասաց Նիկոլ Փաշինյանը:
Գաբրիել Ղազարյանը շնորհակալություն հայտնեց վստահության համար եւ նշեց, որ բազմաթիվ նոր ծրագրեր կան իրականացնելու. «Իրականում առաջին տարին չէ, որ աշխատում ենք այս կոլեկտիվի հետ: Մենք միասին ունենք նորանոր ծրագրեր: Այն խնդիրերը, որոնք դուք բարձրացրեցիք, մենք այդ ուղղությամբ ունենք ծրագրեր: Ակնկալում ենք ձեր աջակցությունը այդ հարցերում»,-ասաց Գաբրիել Ղազարյանը:
Նիկոլ Փաշինյանը նշեց, որ բնականաբար իր աջակցությունը կլինի: