Ապրիլի 21-ին Շրի Լանկայում որոտացած 8 պայթյունների հետևանքով զոհերի թիվը 310-ի է հասել, ևս 480-ը վիրավոր են, գրում է The Guardian-ը: Ավելի վաղ հաղորդվել էր 290 զոհի մասին:
Շրի Լանկայի իշխանությունները ողբերգության առնչությամբ ապրիլի 23-ը սգո օր են հայտարարել՝ խնդրելով բնակիչներին տների մոտ սպիտակ դրոշներ կախել: Տեղի ժամանակով ժամը 8:30-ի սահմաններում կղզային պետության բնակիչները 3 րոպե լռությամբ հարգել են զոհերի հիշատակը, այնուհետև սկսվել է զոհերի զանգվածային հուղարկավորությունը:
Հիշեցնենք, որ անցած կիրակի՝ Սուրբ Հարության օրը, Շրի Լանկայի եկեղեցիներում և հյուրանոցներում ընդհանուր առմամբ 8 պայթյուն էր որոտացել: Հարձակման գլխավոր թիրախը տեղի քրիստոնյաներն են եղել: Ոստիկանությունը ձերբակալել է շուրջ 30 կասկածյալի:
Երկրի իշխանություններն ահաբեկչության համար մեղադրում են իսլամիստ ծայրահեղականների «Ազգային Թհովֆիք Ջամաաթ» խմբավորմանը, որը քիչ է հայտնի և մինչ այդ լուրջ հարձակումներ չի իրականացրել:
Հաղորդվում է նաև, որ Շրի Լանկայի անվտանգության ծառայությունը պայթյուններից առնվազն 10 օր առաջ զգուշացվել է ծրագրվող հարձակման մասին, սակայն ոչինչ չի ձեռնարկել, մինչդեռ կառավարության բարձրաստիճան պաշտոնյաները հայտնել են զգուշացմանն անտեղյակ լինելու մասին:
Աղբյուր՝ Tert.am
