Բոլորիս հետ էլ պատահել է. մտնում ենք խանութ՝ ուղղակի «նայելու» կամ միայն հաց գնելու, բայց դուրս ենք գալիս երկու լիքը տոպրակով ու դատարկված բանկային քարտով։ Տանը բացում ենք տոպրակները ու հասկանում՝ այս իրերի կեսն մեզ ընդհանրապես պետք չէին։
Շնորհավորում ենք, դուք դարձել եք մարքեթինգային հերթական «հարձակման» զոհը։ Ահա թե ինչպես են մեզ ստիպում գնել այն, ինչը մեզ պետք չէ։
1. «Մնացել է ընդամենը 2 հատ». Դեֆիցիտի կեղծ զգացում
Սա ամենահին ու ամենաաշխատող հնարքն է։ Երբ տեսնում ենք «Միայն այսօր», «Վերջին 3 նմուշը» կամ «Այս ապրանքին հիմա նայում է ևս 15 հոգի» գրվածքները, մեր ուղեղում միանում է վախի կենտրոնը։ Մենք վախենում ենք բաց թողնել հնարավորությունը (FOMO) և գնում ենք անում՝ առանց մտածելու՝ արդյո՞ք այդ իրն իրոք մեզ անհրաժեշտ է։
2. Դուք գնում եք ոչ թե ապրանքը, այլ «կատարյալ կյանքը»
Գովազդները մեզ չեն վաճառում սուրճի մեքենա կամ օծանելիք։ Նրանք վաճառում են «հաջողակ մարդու առավոտը» կամ «ինքնավստահ կնոջ կերպարը»։ Մարքեթոլոգները գիտեն՝ մենք գնում ենք էմոցիա։ Եթե գովազդում բոլորը երջանիկ են ու ժպտում են այդ ապրանքն օգտագործելիս, մեր ենթագիտակցությունը հուշում է՝ «գնիր սա, և դու էլ նույնքան երջանիկ կլինես»։
3. «Անվճարի» թակարդը
«Գնի՛ր երկուսը, ստացի՛ր երրորդն անվճար»։ Այս ակցիան ստիպում է մեզ ծախսել ավելի շատ գումար, քան նախատեսել էինք։ Մենք կարծում ենք, թե խնայում ենք, բայց իրականում գնում ենք երեք իր, որոնցից երկուսը մեզ հաստատ պետք չէին լինի, եթե այդ գայթակղիչ «անվճար» բառը չլիներ։ Նույնն աշխատում է անվճար առաքման դեպքում. մենք պատրաստ ենք ավելացնել ևս 5000 դրամի անպետք իր զամբյուղում, միայն թե 1000 դրամ առաքման վճար չտանք։
4. Ինստագրամյան «հարևանների» էֆեկտը
Այսօր ամենամեծ գովազդատուն ոչ թե հեռուստացույցն է, այլ սոցցանցերի բլոգերները։ Երբ մենք ամեն օր տեսնում ենք, թե ինչպես է մեր սիրելի բլոգերը օգտագործում այս կամ այն քսուքը կամ գնում հերթական «թրենդային» գաջեթը, մեր մեջ արթնանում է սոցիալական համեմատության բնազդը։ «Եթե բոլորն ունեն, ուրեմն ինձ էլ է պետք»,- մտածում ենք մենք ու սեղմում «Order» կոճակը։
5. Գույների և հոտերի մանիպուլյացիա
Գիտեի՞ք, որ խանութներում հացի կամ վանիլի բույրը պատահական չէ։ Այն ստիպում է ձեզ ենթագիտակցորեն զգալ տանը, հանգստանալ և ավելի երկար մնալ խանութում։ Իսկ կարմիր գույնի զեղչի պիտակները ագրեսիվորեն գրավում են ուշադրությունը՝ թույլ չտալով տեսնել կողքի ավելի էժան, բայց սպիտակ պիտակով ապրանքը։
Ինչպե՞ս չխաբվել.
24 ժամվա կանոնը. Եթե տեսել եք մի իր ու շատ եք ուզում գնել, սպասեք 24 ժամ։ Եթե հաջորդ օրն էլ եք նույնքան ուժեղ ուզում, ուրեմն գուցե այն իրոք պետք է։
Գնումների ցուցակ. Երբեք մի՛ մտեք խանութ առանց հստակ ցուցակի և մի՛ գնացեք գնումների քաղցած վիճակում։
Հարցրեք ձեզ. «Ես սա գնում եմ, որովհետև ինձ պե՞տք է, թե՞ որովհետև սա զեղչված է»։
Իսկ ո՞րն է ձեր ամենաանպետք գնումը, որն արել եք գովազդի ազդեցության տակ։
