ՀՀ Ազգային ժողովի նախագահ Արարատ Միրզոյանը փետրվարի 4-ին ընդունել է Հայաստանում Ամերիկայի Միացյալ Նահանգների գործերի ժամանակավոր հավատարմատար Ռաֆիկ Մանսուրին:
Ողջունելով հյուրին՝ Արարատ Միրզոյանն ընդգծել է, որ Ամերիկայի Միացյալ Նահանգները Հայաստանի կարեւոր գործընկերներից է եւ դիվանագիտական հարաբերությունների հաստատումից ի վեր երկկողմ կապերը փոխադարձ հարգանքի ու վստահության հիման վրա դինամիկ զարգացել են բազմաթիվ ոլորտներում:
Ազգային ժողովի նախագահի համոզմամբ՝ Հայաստանի խորհրդարանը պատրաստակամ է էլ ավելի ընդլայնելու եւ խորացնելու այդ հարաբերությունները:
Անդրադառնալով օրենսդիրների համագործակցության ակտիվացմանը, փոխայցերին ու փորձի փոխանակմանը՝ Ազգային ժողովի նախագահը հույս է հայտնել, որ նորընտիր խորհրդարանում առաջիկայում ձեւավորվելիք բարեկամական խումբն իր գործունեությամբ նոր շունչ կհաղորդի երկկողմ կապերի առավել սերտացմանը:
Օրենսդիր մարմնի ղեկավարը բարձր է գնահատել տարբեր ոլորտներում իրականացվող բարեփոխումների գործում ԱՄՆ կողմից ցուցաբերվող աջակցությունը:
Շնորհավորելով Արարատ Միրզոյանին Ազգային ժողովի կողմից խորհրդարանի նախագահ միաձայն ընտրվելու առթիվ՝ Ռաֆիկ Մանսուրը նշել է. «Հստակ է, որ հայ ժողովուրդն այս Ազգային ժողովից մեծ ակնկալիքներ ունի, եւ ես 2019 թ. ընթացքում սպասում եմ խորհրդարանականների կողմից իրենց մանդատի կենսագործմանն ուղղված ջանքերին»:
Խորհրդարանի ղեկավարը, շնորհակալություն հայտնելով շնորհավորանքի համար, ընդգծել է. «Ժողովրդավարությունը, արդյունավետ եւ թափանցիկ կառավարումը, մարդու իրավունքների եւ ազատությունների երաշխավորումն ու պաշտպանությունը մեզ համար այն հիմնարար արժեքներն են, որոնց վրա խարսխվում է մեր իշխանության գործունեությունը»:
Զրուցակիցներն անդրադարձել են մեր երկրում ժողովրդավարության զարգացմանը, օրենսդրական դաշտի կատարելագործմանը, կոռուպցիայի դեմ պայքարի հարցում իրականացվող քայլերին, երկուստեք հետաքրքրություն ներկայացնող այլ հարցերի:
