168.am-ից տեղեկանում ենք․
«Հայկական նախաձեռնություն» բարեգործական հիմնադրամ են դիմել մի խումբ հայեր՝ խնդրելով ուշադրություն դարձնել Կիևում «Աշան» հիպերմարկետների ցանցի խանութներում ապրանքների դասավորվածությանը: Նրանք հայտնել են, որ հայկական արտադրության ապրանքները վաճառվում են ադրբեջանական դրոշի ներքո:
Ինչպես հայտնում է «Հայկական նախաձեռնություն» բարեգործական հիմնադրամի պաշտոնական կայքը, հիմնադրամի նախագահ Հայկ Աղվանյանը տեղեկատվությունը ճշտելու համար այցելել է Կիևում գտնվող «Աշան» ցանցի մի շարք խանութներ: Նա նկարել է Հայաստանի դրոշով դարակները, որոնք գրեթե դատարկ են եղել, իսկ Ադրբեջանի դրոշով դարակները լցված են եղել հայկական արտադրության ապրանքներով: Հայկ Աղվանյանը լուսանկարները հրապարակել է «Ֆեյսբուք»-ի իր էջում:
Խնդիրը կարգավորելու, հետագա գործողությունները համակարգելու համար հիմնադրամի ղեկավարությունը որոշել է սպասել Ուկրաինայում ՀՀ դեսպան Տիգրան Սեյրանյանի ժամանմանը:
Փետրվարի 6-ին Հայկ Աղվանյանը պաշտոնապես դիմել է «Աշան» առևտրային ցանցի ղեկավարությանը: Նշվում է, որ մի քանի ժամվա ընթացքում ցանցի խանութներից մեկում իրավիճակը շտկվել է, իսկ մյուս խանութներում կշտկվի մի քանի օրվա ընթացքում: Առևտրային ցանցի ղեկավարությունը նաև ներողություն է խնդրել Հայկ Աղվանյանից ոչ ճիշտ քայլերի համար և շնորհակալություն հայտնել նրան՝ խնդրի վրա ուշադրություն հրավիրելու համար:
Քանի որ գործողությունները համաձայնեցվել են Ուկրաինայում Հայաստանի դեսպանատան հետ, «Աշան»-ի ղեկավարությունը նամակ է գրել Ուկրաինայում ՀՀ դեսպան Տիգրան Սեյրանյանին, որում ներողություն են խնդրել և տվել են ազգային դարակներում ապրանքների դասավորվածության նկատմամբ մշտական վերահսկողության երաշխիքներ:
