Երրորդ նախագահի փաստաբան Ամրամ Մակինյանը tert.am-ի հետ զրույցում հայտարարել է, որ Սերժ Սարգսյանն իրեն մեղավոր չի ճանաչում, ունի շատ հիմնավոր կարծիք՝ իր նկատմամբ քաղաքական հետապնդում է տեղի ունենում։
Հիշեցնենք, որ ՀՀ նախկին նախագահ Սերժ Սարգսյանին մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով նախատեսված հանրորեն վտանգավոր այն արարքի կատարման համար, որ նա, 2008 թվականի ապրիլի 9-ից մինչև 2018 թվականի ապրիլի 9-ը զբաղեցնելով ՀՀ նախագահի պաշտոնը, իր պաշտոնեական դիրքն օգտագործելով, 2013 թվականի հունվարի 25-ից փետրվարի 7-ը կազմակերպել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489.160.310 ՀՀ դրամի հափշտակություն:
Փաստաբանի խոսքով՝ հարցաքննությունն ավարտվելուց հետո կատարվել է առերես հարցաքննություն այս քրեական գործով անցնող և մեղադրյալի դատավարական կարգավիճակ ունեցող անձի հետ: Առերեսումն ավարտվել է 16:10-ին:
«Ժամը 16:12 րոպեին քննիչը սեղանից շրջեց փաստաթղթեր, որոնք վերնագրված էին որպես մեղադրյալ ներգրավվելու մասին որոշում: Սա առնվազն կախարդանք կարող է լինել այն իմաստով, որ 6 թերթից կազմված որոշումը քննիչը կարող էր իմ, իմ գործընկերոջ և պարոն նախագահի ներկայությամբ 2 րոպեում կազմել, տպել և ներկայացնել: Քրեական դատավարության մասին օրենսգիրքն ասում է՝ անձին որպես մեղադրյալ ներգրավելու հիմքը բավարար ապացույցների համակցությունն է: Սա ուղիղ ցույց է տալիս, որ պարոն Սարգսյանի հարցաքննությունը, առերեսումը վարույթն իրականացնող մարմնի համար կոպեկի արժեք ի սկզբանե չունեին: Որոշումն արդեն ընդունված էր: Մենք համոզմունք ունենք, որ որոշումը չէր ընդունվել ՀՔԾ շենքում: Այս որոշումն արդեն ընդունված, կայացված և ձեւակերպված էր»,- ասել է երրորդ նախագահի փաստաբանը:
Նա նաև հավելել է, որ պատրաստվում են նախագահի անձեռնմխելիության ինստիտուտը չհաղթահարելու պայմաններում որպես մեղադրյալ ներգրավելու խափանման միջոց կիրառելու փաստը բողոքարկել գլխավոր դատախազին և պահանջելու են «վերացնել անհիմն որոշումը»:
Ըստ փաստաբանի՝ մեղադրանքի օրինականության կամ հիմնավորվածության կասկածներն ակնհայտ են անգամ այն մարդկանց համար, որոնք քրեադատավարական պրոցեսներին երբևէ մասնակից չեն եղել կամ որոշակի տեղեկություններ չունեն, թե ինչպես են ընթանում այս քրեադատավարական պրոցեսները, միայն այսքանը բավարար է գնահատելու, որ պարոն Սարգսյանի նկատմամբ քաղաքական հետապնդում է իրականացվում»,- ասել է Ամրամ Մակինյանը:
Ըստ նրա՝ առերեսում եղել է մեկ անձի հետ, և այդ անձի մոտ այնպիսի ջղաձիգ և շփոթված վիճակ էր, որ անգամ Ա4 ֆորմատի թղթի վրա ստորագրելու ժամանակ մեծ լարում էր պահանջվում, որ ճիշտ տեղում ստորագրի:
«Այդ անձի հուզական վիճակն ինձ համար բավականին հարցեր է առաջացրել. ինչո՞ւ է անձն այդ աստիճան հուզված և լարված: Ես այս հարցերի պատասխանը գտնելու համար օրենքով սահմանված և չարգելված իմ գործառույթներն ամբողջ ծավալով իրականացնելու եմ»,- ասել է Մակինյանը:
tert.am-ի դիտարկմանը, որ նախքան լուրը կտարածվեր, որ Սերժ Սարգսյանը որպես մեղադրյալ է ներգրավված, սոցիալական ցանցերում արդեն պտտվում էր նախկին գյուղնախարար Սերգո Կարապետյանի լուսանկարը, և տեղեկություն էր տարածվել, որ նախկին նախարարն իրեն փրկելու համար է Սերժ Սարգսյանի դեմ ցուցմունք տվել և հարցին, թե արդյո՞ք անձը, ում հետ առերեսում է տեղի ունեցել, Սերգո Կարապետյանն է, փաստաբանը չի հաստատել.
«Նախաքննության գաղտնիքից ելնելով չեմ կարող այդ անձի անուն ազգանունը հնչեցնել: Ես չեմ ցանկանում Ձեր հարցին պատասխանել, սակայն կա մի բայց. անկախ նրանից թե ով ում հետ է առերեսվում, անկախ նրանից, թե ինչ հանգամանքներ են, եթե անձի ցուցմունքներն արժանահավատ են, եթե անձը գտնում է, որ ինքը ճիշտ ցուցմունք է տալիս, չեմ կարծում, որ անձի մոտ այդպիսի լարվածություն առաջանար, այդպիսի ջղային շարժումներ և շփոթվածություն լինեին»:
Ամրամ Մակինյանը ներկայացրել է եւս մի քանի փաստ: Ըստ նրա՝ անցած ուրբաթ ՀՔԾ-ն Սերժ Սարգսյանին որպես վկա հարցաքննության կանչելու ծանուցագիր էր ուղարկել՝ դեկտեմբերի 4-ին, ժամը 13։30-ին ներկայանալու համար:
«Շատ հստակ նշվել է անձի դատավարական կարգավիճակը, որը պայմանավորված է նրանով, որ օրենսդիրը պարտադրում է քննիչին անձին հարցաքննության կանչելուց առաջ ֆիքսել դատավարական կարգավիճակը»,- ասել է Մակինյանը: Մինչդեռ, երբ Սերժ Սարգսյանը ներկայացել է հարցաքննության, քննիչն այդ ժամանակ տեղեկացրել է, որ կասկածանքի շուրջ է հարցաքննվելու:
«Երբ այդ փաստը մեզ հայտնեցին, շատ լուրջ իրավական խնդիր առաջացավ: Քանի որ Սերժ Սարգսյանին հարցեր պիտի ուղղվեին իր պաշտոնավարման ժամանակահատվածում պաշտոնական դիրքի բերումով կատարված որոշակի գործողությունների վերաբերյալ: ՀՀ Սահմանադրության 2005 և 2015 թվականի փոփոխությունները ՀՀ նախագահին օժտում են անձեռնմխելիությամբ: Այդ իրավիճակում վարույթ իրականացնող մարմնի մոտ պետք է հարց առաջանար՝ հաղթահարվե՞լ է արդյոք նախագահի անձեռնմխելիությունը, թե ոչ»,- ասել է փաստաբանը:
Նրա խոսքով՝ իրենք անմիջապես համապատասխան առարկություն են ներկայացրել, որ նախագահն օժտված է անձեռնմխելիությամբ, սակայն դա ոչինչ չի փոխել վարույթն իրականացնող մարմնի գործողություններում և շարունակվել է հարցաքննությունը կասկածյալի կարգավիճակում:
