Հոլիվուդյան աստղ Շերոն Սթոունը, կարծես, մարտահրավեր է նետում ժամանակին։ 67 տարեկանում նա շարունակում է զարմացնել իր համարձակությամբ և անթերի տեսքով՝ հայտնվելով Harper’s Bazaar Spain ամսագրի սեպտեմբերյան համարի շապիկին։ Նոր ֆոտոշարքը բուռն քննարկումների առիթ է դարձել՝ շատերին հիշեցնելով նրա ամենահայտնի դերերից մեկը։
Լուսանկարներում, որոնք արվել են իսպանական Harper’s Bazaar-ի համար, Սթոունը ներկայանում է մի քանի գայթակղիչ կերպարներում, այդ թվում՝ կիսաթափանցիկ սև զգեստով։ Լուսանկարներից մեկը հատկապես ուշագրավ է իր համարձակ դիրքով, որը ուղիղ զուգահեռներ է անցկացնում 1992 թվականի «Հիմնական բնազդ» էրոտիկ թրիլլերի հետ։
Ֆիլմի լեգենդար տեսարանից, որտեղ նրա հերոսուհին՝ Քեթրին Թրամելը, հարցաքննության ժամանակ ոտքը ոտքին էր գցում առանց ներքնազգեստի, անցել է արդեն 33 տարի, սակայն դերասանուհու խարիզման ու գրավչությունը մնացել են անփոփոխ։
Ո՛չ ֆիլմի վերաթողարկմանը
Այս ֆոտոշարքի ֆոնին դերասանուհին վերջերս հերքել է լուրերը, թե հնարավոր է մասնակցի ֆիլմի վերաթողարկմանը (ռեբութին)։ Նա հիշեցրել է, որ 2006 թվականին թողարկված շարունակությունը՝ «Հիմնական բնազդ 2»-ը, որտեղ նա կրկին մարմնավորել էր Թրամելին, ջախջախիչ քննադատության էր արժանացել։
Այդ առիթով Սթոունը նշել է․ «Եթե այն նույն ճանապարհով գնա, ինչպես իմ մասնակցությամբ ֆիլմը, չեմ հասկանում՝ ինչու պետք է դա անել։ Առաջ գնացեք, բայց հաջողություն ձեզ»։
Կարիերայի ամենամեծ վախը
Հետաքրքիր է, որ անցյալ տարի Շերոն Սթոունը կիսվել էր իր վախերով՝ խոստովանելով, որ իր ողջ կարիերայի ընթացքում վախեցել է մոլի երկրպագուի կողմից սպանվելուց։ Այս վախը նրա մոտ առաջացել է Սիլվեստր Ստալոնեի հետ զրույցից հետո։
«Սլայը ինձ ասաց, որ հանկարծ դու քայլում ես փողոցով, և բոլորը սկսում են ձեռքները տանել դեպի գրպանը, և դու չգիտես՝ նրանք գրիչ են հանելու ինքնագիր վերցնելու համար, թե զենք։ Դա է, որ դառնում է շատ անհանգստացնող»,— պատմել է դերասանուհին։
