Ադրբեջանի ԱԳՆ-ն մեկնաբանել է Հայաստանի Ազգային անվտանգության ծառայության տնօրեն Արթուր Վանեցյանի հայտարարությունն Արցախի ազատագրված տարածքների վերաբնակեցման ծրագրի մասին, – այս մասին տեղեկանում ենք Tert.am-ից:
«Արթուր Վանեցյանի հայտարարությունը վկայում է տարածքների օկուպացմանն անմիջական մասնակցության մասին»,- իր թվիթերյան էջում գրել է Ադրբեջանի ԱԳՆ խոսնակ Լեյլա Աբդուլաևան:
Վերջինս ընդգծել է, որ Հայաստանն է պատասխանատվություն կրում նման «սադրիչ հայտարարությունների հնարավոր բացասական հետևանքների համար»:
«Թրենդ» գործակալության փոխանցմամբ՝ ԱԳՆ-ից հայտնել են, որ Ադրբեջանն այս հարցով դիմելու է ՄԱԿ-ին, ԵԱՀԿ-ին և այլ միջազգային կազմակերպությունների:
Հիշեցնենք, որ Արթուր Վանեցյանն Արցախ կատարած այցի շրջանակներում հայտարարել էր, որ «ոչ մի թիզ հող հետ հանձնելու նպատակ չունենք, և մեր հողերում պետք է բնակվեն մեր հայրենակիցները և շենացնեն մեր երկիրը»:
